mercredi 11 février 2015

Totes ensems davant los Despartaments !

Aqueste matin, davant lo Conselh General de l'Erau, i avià pas un monde tarrible mas un monde de tria e un ambient fòrça simpatic ! La tòca èra de se mostrar amb de drapeus alara que se debanava lo darrièr conselh. Un pauc de musica, un pauc de dança, de solelh a moldre, la premsa curiosa...
Per contre lo 2 d'abriu nos caldrà estre un molon al meteis luòc : serà lo primièr conselh despartementau. Caldrà lor rampelar que benlèu qu'es pas una obligacion, mas demora una possibilitat per los politics de sostener lenga e cultura occitanas e una possiblitat desirada per de nombroses personas.
S'aquò erà possible dins cada despartament, al meteis moment, seriá una brava capitada.  I cresi, se deissem pas lo nòstre pichòt monde s'entre estripar. Vòli veire sonqu'una causa : sem totes motivats per la meteissa causa, lo demest, rai !

lundi 9 février 2015

Sant Blasi a Pesenàs

Ier de sèr Pesenàs a festejat la debuta de la sason de Carnaval amb la Sant Blasi. L'ors e los arbres se desrevelhan doçament e son partits, seguits del monde del vilatge per anar querir Sant Blasi a l'igreja. Montat de rebors sur son ase, a menat la còla fins a l'ostal dels capitols per lor mandar las claus. Mancava pas pus qu'a batejar lo polin enfin sortit de son grand som, per festejar sus las musicas machadas jogadas al pifre e al tambor.
Tot s'es acabat amb un balèti, per desoblidar lo freg, amb Charrié-Falco.
Quitament sens tròp de mejans (aïe las subvencions) Pesenàs s'es encara petaçat per sarrar sas tradicions.

Lo polin, Carnaval 2008 @Sylvie Berger